વાપરો કળ ને બનાવો મને !
લાશ છું હું, બસ તરાવો મને!
એમ બનતી હોય જો આ ગઝલ,
લો કલમ- કાગળ, લખાવો મને !
સત્ય કહેવું જો ગુનો હોય તો,
લો શુળીએ પણ ચઢાવો મને.
જિંદગીએ બહુ રડાવ્યો મને,
હું ભૂલ્યો હસવું, હસાવો મને.
સાદગીમાં જિંદગી થઇ પુરી,
ના હવે દોસ્તો સજાવો મને.
- રાકેશ ઠક્કર
દિલમાં આંધી ગઝલ,
સત્યમાં ગાંધી ગઝલ.
છોડવું ગમશે બધું,
એક આ બાંધી ગઝલ.
અર્થનું કર લક્ષ્ય ને,
નાંખ તું વીંધી ગઝલ.
દિલની દોલત એ જ છે ,
માંગતા દીધી ગઝલ.
જોઇ એનો પ્રેમ ખૂબ,
આજ થૈ ઘાંઘી ગઝલ.
ભૂલવા આ લોકને,
દોસ્ત મેં સાધી ગઝલ.
શબ્દ તો છટપટ કરે,
છંદમાં નાથી ગઝલ.
- રાકેશ ઠક્કર
ડૂબતો જા ભીતર ભીતર,
ખૂંપતો જા અંદર અંદર!
પાસ જઇને દેખી જો તું,
દૂરથી તો સુંદર સુંદર!
લાગતું કે અંગત છે એ,
દિલથી તો અંતર અંતર.
જિંદગીનો મારગ લાંબો,
ચાલ તો છે મંથર મંથર!
મઘમઘી જાયે તન ને મન,
યાદ એની અત્તર અત્તર!
- રાકેશ ઠક્કર
આસમાને તું જરા તારા ગણી જો!
ને હવામાં ભીંત તું તારે ચણી જો!
બાળકોના હાસ્યમાં એ છે સમાયા,
કેમ કહું કે ગ્રંથ – ગીતાને ભણી જો.
જોર જીવનમાં ઘણું છે આમ તો ભૈ,
તું ય ઘોડા જેમ થોડું હણહણી જો.
આમ તો માની ગયા એ ભૂલ થઇ’તી,
પણ હજુ સ્વીકારતા ક્યાં છે, ટણી જો!
લે ઉદાસી તો ઉડી જાશે ક્ષણોમાં,
દિલથી તું મસ્ત ગીતો ગણગણી જો!
પ્રેમની સાચી નિશાની એ જ છે રે,
આ હૃદયમાં છે વધી ધડકન, ગણી જો!
- રાકેશ ઠક્કર
Gujarati Kavita - “ગુજરાતી કવિતાઓ” is powered by WordPress
Free Wordpress themes distributed by Rock Kitty
